Од 27 до 31 Август во Охрид се одржa Охридскиот Хорски фестивал во организација на Охридскиот Хор. Учествуваа четириесет хорови од четиринаесет земји: Романија, Литванија, Летонија, Словенија, Србија, Хрватска, Полска, Чешка, Норвешка, Данска, Унгарија, Босна и Херцеговина, Бугарија и Македонија. Најголем дел од програмата се одвиваше во прекрасниот амбиент на Дијамантската сала на хотелот Инекс Горица, а дел од фестивалот во црквата Св. Кирил и Методиј. Во 5 фестивалски денови се одржаа 11 концерти и тоа 6 натпреварувачки концерти, 2 концерти на духовна музика, еден концерт на поп музика и концерт на фолк музика. Концертите беа извонредно посетени (400 – 500 луѓе на секој концерт). Крајот на Фестивалот го одбележи големиот гала концерт каде настапија најдобрите хорови кои се натпреваруваа за големата награда на Охридскиот хорски фестивал. На завршниот гала концерт настапија осум хорови кои беа одбрани од стручното жири: детскиот хор „Фантазија “ од Романија, младинскиоот женски хор „Груднове Шмикле“ од Словенија, младинскиот мешан хор „Славенски“ од Србија, камерниот мешан хор „Ваш Лајош“ од Унгарија, Сортландскиот машки хор од Норвешка, Академскиот мешан хор „Палма“ од Хрватска, Мешаниот хор „Ангел Букурештлиев“ од Бугарија и Mешаниот хор на Шлезискиот технолошки универзитет од Полска. Сите овие хорови го освоија првото место во своите категории, а за најдобар меѓу нив жирито го прогласи хорот „Груднове шмикле“ од Железники, Словенија под раковотство на Маијета Наглич (Гран-при). Сите хорови изведуваа по едно дело од Македонски автор на македонски јазик, а специјани награди за изведба на дело од македонски јазик добија хоровите „Вива воче“ од Унгарија за изведба на компоозицијата „Оздола иде мале“ од Драган Шуплевски, хорот „Славенски“ од Србија за изведба на „Хумореска 1“ од Живко Фирфов и Нишкиот мешан хор од Србија за изведбата на композицијата „Бисера“ од Стојче Тошевски. Организаторот понуди и богата програма на отворено – хоровите секојдневно настапуваа на различни локации во Охрид и околината. За време на одржувањето на Фестивалот, Охрид се претвора во една голема музичка сцена и убавата хорска музика отпеана на толку различни јазици, го исполнува градот, совршено вклопувајки се во неговиот амбиент и преплетувајки се со шумот на брановите на Охридското езеро. Овој пристап на одржување на концерти на отворено, придонесува кон поголема популаризациија на хорската музика и агитирање нова публика за ваков тип концерти, што е во согласност со заложбите на Охридскиот хорски фестивал. Фестивалот го пратеа музички новинари од Македоија, Бугарија и Србија.



„Охридскиот хорски фестивал прераснува во најголема, најквалитетна и најзначајна хорска манифестиација во овој дел од Европа рамо до рамо со големите Европски хорски фестивали.“

проф. Бранко Ѓурковиќ
на конференцијата за хорско диригирање и интерпретација

„Охридскиот хорски фестивал е најголемиот празник
на хорската уметност“

академик Валентин Бобевски

„Не можеше да биде подобро. Фестивалот ги надмина сите наши очекувања. Охрабрени сме од задоволството на сите присутни.“

м-р Александар Димоски,
претседател на Организацискиот одбор

„Прекрасно организиран фестивал на кој можевме да слушнеме многу добри изведби.“

Мануела Манчева-Борисова,
новинар во културната редакција на Бугарското радио

Идеен зачетник и Претседател на организационит одбор е флејтистот и диригент на Охридскиот хор м-р Александар Димоски. Охридскиот хор постои три години и беше основан со цел заживување на Хорската уметност во градот Охрид. Хорот секоја година одржува по неколку хуманитарни концерти во Охрид, а имаат настапувано и на Хорски фестивали вон Македонија.

Охридскиот Хорски Фестивал годинава е поддржан од Општина Охрид и за жал не е поддржан од Министерството за култура.